مرض السكري في مجتمعنا بين الوعي والمجاملة

الاستاذ عوض النعسان وجيرانه كان الهم هذا الحديث عن مرض السكري :
• المختار : أأخ ياجماعة راح اموت حاسس بتعب مش طبيعي شكلوا السكر ارتفع عندي بشكل كبير , يقطع العزايم ويومها .
• ابو رامي : يامختار لازم تهتم كثير بصحتك انت مابترحم حالك والسكر طالع نازل, وبعدين يا اخي لما تروح على عزومة مافي داعي تاكل كلشي .
• المختار: بس الواحد لازم يجامل ياابورامي منت عارف طلاق من زيد وطلاق من عبيد وبعدين ازا ما اكلت ما بتخلص .
• ابو رامي : بس صحتك اهم من الناس واهم من طلاقاتها .
• ابو حفظي : كلام ابو رامي صحيح انا خالي ابو ماضي بعاني من المرض الو عشرين سنه بس محافظ على صحته كثير لانو ما برد على الناس وماباكل الا الي بفيدو.
• المختار : وكيف دخلك محافظ عليها ليكون من بوكل سكر من مرة.
• ابو حفظي : هههه له يامختار هو الانسان بستغني عن السكر, بس خالي بتناول كل اشي بعقل ومنطق وبياكل الشغلات الي فيها سكريات بنسبة قليلة وبعدين دايما وهاد اهم اشي انو بعمل فحص دوري لجسمة .
• ابورامي : وهاد الفحص موجود بعلب زغيرة بقدر المريض يفحص حاله من حالة .
• المختار : يعني هسا الانسان بقدر يفحص حالو من غير مختبر ودكتور .
• ابو رامي : نعم صحيح , والاهم من كل هادا يامختار انك تحاول تنزل من وزنك لانك ناصح وهاد الحكي بأثر عليك ويمكن يزيد المرض عندك .
• المختار : ياجماعة انتوا خوفتوني .
• ابورامي : لا تخاف ولا اشي الحمية المنطقية والابتعاد عن السكر الابيض بشكل مباشر او غير مباشر بريحك وبحافظ على صحتك.
• ابو حفظي : وعشان نطمنك اكثر روح زور الطبيب وخلي يفحصك ويكتبلك على العلاج المناسب .
• المختار : وهاض الي لازم اسوي اروح على دكتور السكري خاطركوا .
وذهب المختار الى احد اطباء امراض السكر والغدد الصماء ليفحصوا ......

• المختار : مرحبا يادكتور ...انا حاسس انو عندي مرض السكر وحابب اعالج حالي. الطبيب : اهلين يامختار بداية لازم نعمل شوي فحوصات مخبرية عشان نتأكد من اصابتك بالسكر وبعدين بندردش سوا عن طبيعة المرض الي معك .
وبالفعل راح المختار وعمل فحوصات في المختبر ورجع على الطبيب من جديد ومعوا جيرانه.
• الطبيب : اهلين يامختار وبجيرانك كمان .
• المختار: اهلين فيك يا حكيم , تفضل وهاي الفحوصات الي طلبتها مني .
• الطبيب : كتير منيح , هلأ انت يامختار وحسب الفحوصات مصاب بالسكر ومع الاسف النسبة عندك عاليه وهاد بشكل خطورة على حياتك.
• ابورامي : قلقتنا على المختار ,خير يادكتور ..
• ابو حفظي : يعني يادكتور الموضوع بخوف .
• الطبيب : ياجماعة ماتخوفوا المختار , الموضوع بس بدو شوي حمية لانو وزن المختار فوق 90 كيلو وعلى مايبدو انوا بحب الحلويات والرز والشحوم ,صح يامختار .
• المختار : فعلا يا دكتور ..منت عارف عشني مختار لازم اجامل الناس واكل كلشي عندهم .
• الطبيب : لازم تعرف يامختار انت وجيرانك عدة امور: منها الابتعاد عن مجاملة الناس على حساب صحتنا , يعني هون منسف وهناك سدر كنافة وشوي اكل كلو دهنيات ونشويات على بعض الاكلات الي فيها الدسم عالي هاد الحكي لازم نتجنبوا .
• ابو رامي : وهاد الي كنا نقوله لمختارنا , يعني الصحة اولا .
• ابو حفظي : بس يا دكتور الواحد الا ما يجامل الناس .
• الطبيب : جاملهم بس مش على حساب صحتك , اسمع يا مختار راح اكتبلك على دوا لازم تاخدة , وضروري جدا انك تهتم بالاكل الصحي الي بتناوله .
• ابورامي : دكتور عندي سؤال ؟
• الطبيب : تفضل يا ابو رامي ..
• ابو رامي : مرض السكري الو تأثير على الضعف الجنسي؟
• الطبيب : طبعا يا ابورامي بأثر بشكل مباشر وكمان بصيب القلب والأوعية الدموية والعينين والكليتين والأعصاب.
• ابو حفظي : الله يعافينا يارب , طيب والتدخين الو علاقة كمان .
• الطبيب : التدخين اصلا بشكل خطورة على الجسم وكمان بعمل مضاعفات على مرضى السكري بشكل كبير عشان هيك لازم مريض السكري يترك التخدين فورا والى الابد.
• المختار : شكرا يادكتور ,,,وبوعدك اني امشي على تعليماتك.
• ابو رامي : فعلا الصحة تاج على رؤوس الاصحاء لايراها الا المرضى .
• ابو حفظي : وتنسوش ياجماعة انو درهم وقاية خير من فنطار علاج.
• الطبيب : واخيرا العقل السليم في الجسم السليم .

مرض السكري اجهد عدد كبير من الناس اذ تشير الاحصائيات الى اصابة حوالي ثلاثين مليون إنسان في العالم وكثير منهم لا يعلمون أنهم مصابون به.
اما اعراض هذا الداء غالبا ما تبدأ من خلال شعور الشخص بالعطش الشديد او الحكة الزائدة في الجسم او التعب والارهاق او نزول في الوزن بشكل ملحوظ او التبول المتكرر, واحيانا تلعب الوراثة دورا كبيرا في اصابة الانسان بالسكر .

اخصائيو امراض السكري دعوا المرضى الى ضرورة الامتناع عن الحلويات السريعة والمشروبات التي تحتوي السكر الابيض والتي من شأنها ان ترفع من نسبة السكر في الدم.
واضاف الاخصائيون الى ان هناك بعض المأكولات التي تحتوي على سكر بديل بأستطاعة المريض ان يتناوله بكل سهولة .

ومن الملاحظات التي اهتم بها اطباء السكر هي دعوة مرضى السكري الى ضرورة الفحص الدوري من اجل تنظيم نسبة السكر لديهم .

منظمة الصحة العالمية دعت لتشجيع ودعم اعتماد تدابير فعالة لرصد حالات السكري والعمل على مكافحتهاوخاصة في البلدان المنخفضة الدخل من خلال توفير الدلائل العلمية اللازمة لتوقي السكري وضع قواعد ومعايير لرعايتة , كما ودعت الى إذكاء الوعي بالسكري الذي بدأ يتخذ أبعادًا عالمية بما في ذلك إقامة شراكات مع الاتحاد الدولي للسكري.

خلاصة الحكي بالثقافة والوعي والارادة القوية وبإبتعادنا عن الاطعمة والمأكولات التي تحتوي على السكريات والنشويات والدهنيات او التقليل منها بكشل كبير وايضا الفحص الدوري يضمن لنا صحة وعافية باذن الله .