بلا ما نحكي سياسة!

رايه نيوز: كنت ماشي مع اصحابي "نزال و ابو كرش" على شاطئ لارنكا في قبرص، مبسوطين بنتفرج على البحر والعالـم الحلوة اللي بتسبح، وكنا مقررين من قبل انو ما نحكي سياسة وخلينا نتمتع في هالطلعة. الـمهم شو بدكم من الطويلة. قررنا نوصل لعند قصر قديم وجنبو جامع. وصلنا هناك عند الجامع وسألنا زلـمة مارق بالطريق باللغة الانجليزية:
_ الجامع شغال؟
_ الزلـمة: شغال في جميع الأوقات.
الزلـمة: طب ليه بتحكوا انجليزي..احكو معي عربي.
_انت عربي؟
الزلـمة: لا انا فلسطيني.
_واحنا كمان فلسطينية من طولكرم، قلقيلية، الخليل.
لو انكم شفتوا شو صار بالزلـمة، عنيه بلشوا يدمعوا، وما أصعب انك تشوف رجال في الأربعينات وهو ببكي، صار يحكيلنا "أنا كمان فلسطيني، بس لاجئ.. والله ما بعرف بتقدروا تقولوا لاجئ مكرر أو يمكن "مُقرر"...أول مرة من حيفا.. وبعدين من العراق؛ نزحنا وتشتتنا من العراق بعد ظروف صعبة مرينا فيها..وهلأ هيني لاجئ مع كمان 3000 فلسطيني زيي...بس ربنا الله، والحمد لله، معي كرت مؤن قبرصي معونات من الحكومة... بس والله هالكرت ذل ومهانة.. ممنوع نشتغل.. ممنوع... ممنوع... لو ياخدو هالكرت وانا بجيب أكلي وبعين حالي... مهو السؤال لغير الله مذلة.. آه والله. بتلاقينا قاعدين هون عطالين بطالين... مع هالكلاب في الشوارع بنلف وبنضيع وقت... حياة الكلاب أحسن من حياتنا... استغفر الله العظيم... خلص خلوها على الله يا شباب...
ولأول مرة بعرفش أحكي... أي والله احترت شو أرد، بس بديت أحكي له عن قضيتنا الـمعقدة، وأمزح معاه بلكي أخفف عليه شوي "يا عمي مين قدك، هيك لاجئ سياحي، وشو بدك أحلى من هيك عيشة... بس شكلي زدت النار بدل ما أهديها، فبلش يصرخ الزلـمة" لاجئ سياحي؟؟ليكون هيك مفكرينا عن جد وعشان هيك ولا حدى سائل عنا؟؟... طب احنا فلسطينية... ولا خلص حلوا قضيتنا بإنهم حطونا هون وخلصو منا؟... يا عمي جماعتنا مش سائلين عنا... ولا معترفين فينا... .
مقدرناش نتحمل عذاب كلـمات الزلـمة، حكيتله بوعدك انا نحكي عنكم... واندق هالاجراس... سلـمنا على الزلـمة... وبدينا نقاش بيغلي، مع العلـم انه ما بدنا نحكي سياسة.
أبو كرش: حياتنا صعبة، رأيك في حدا سائل عنهم؟ احنا بس بنسأل فيه تعديل حكومي ولا ما في تعديل؟ فيه راتب ولا ما فيه؟ أي إذا الـمواطن اللي جوا البلد وقدام عيونهم ضايع؟ فكرك هالـمسخمين اللي برة مش ضايعين؟ أي ما هي البلد ضايعة... ملتهيين بشغلات فارطة وقصص ما بتنتهي.
تخيلوا يا جماعة، انه اللاجئ الفلسطيني بدخل في مرحلة لجوء ثانية وثالثة... وقضايانا بتكبر، وما بنشوف كيف بعيشوا وشو أحوالهم.. وصار اللجوء الفلسطيني مشكل وملون وما في حدا بدرس الوضع القائم وكيف ممكن نوحد رؤيتنا. تخيلو حيفا على عراق على قبرص... والله يستر كمان شوي لوين يروحو.
لازم دائرة شؤون اللاجئين في منظمة التحرير تتحرك بشكل أقوى، وبرضو وزارة خارجيتنا تشوف شو فيه امكانية لتحسين أوضاع فلسطينية قبرص.. الـمهم ما ننسى دمنا ولحمنا اللي بنشوى أكثر من مرة بسببنا...
بعدها اتعرفنا على مجموعة شباب فلسطينية متلقحة في الشارع عرفناهم من الأغاني اللي حاطينها "هبت النار والبارود غنى... اطلب شباب يا وطن واتمنى..." حكولنا أجمل ما في الشتات انه بزيد وطنيتنا وهويتنا الفلسطينية... واحنا الـمتشردين بنحب فلسطين أكثر منكم، احنا هون في قبرص بنحلـم .. وبدنا انضل نحلـم وما راح يمنعنا حدا انا نحلـم بالعودة والاستقرار.. بس الـمهم قيادتنا ما اتخلي حلـمنا كابوس...
هدول الشباب بعرفوا فلسطين بس بالسمع... تخيلوا وشوفوا كم بحبوها... بتعرفوا انهم مواليد العراق، وكانوا بعتبروا حالهم جزء من العراق يعني أولاد البلد... بس بتعرفوا شو اللي صار بعد الازمات اللي اتلقتها العراق... اتعاملوا انه الفلسطينيين هو أسهل جزء لازم يخلص منه الجسد العراقي.
في واحد اسمه أبو تحسين، نط فجأة وقال اسمع يا أبو الشباب والله انا احنا بنرفع الراس الفلسطينية... واسمعوا يا شباب اذا ما تحركنا وما طلعنا مظاهرات صدكوني يا اخوان ما راح يطعمونا ويشربونا. لانه في قبرص بخافوا من الـمظاهرات وبخافوا ينكشفوا على حقيقتهم قدام العالـم. لازم نتحرك ونوصل صوتنا للامم الـمتحدة. والعالـم لازم يحطوا قوانين حالهم حال الاتحاد الاوربي، انا بحذركم من السكوت لا تسكتوا، طالبو بحقوق كل فلسطيني في قبرص.. ولازم نطالب بكل حقوق الفلسطينيين في العالـم..
ارجعنا على الفندق وقررنا ما نحكي سياسة، بس أول شغله اعملناها انو فتحت على النت اتفرج على الأخبار.. وأبو كرش ونزال فتحوا على الجزيرة الانجليزية.. بس احنا ما حكينا في السياسة... .