الأخضر بعمل عمايل على الجسر

رايه نيوز: قررت أكتب زاوية "خرم إبرة" لهذا الأسبوع من قلب الحدث، في نقل حي ومباشر من قلب معاناة "الفي آي بي" على جسر الملك حسين، واللي بشوفه راح تقرأوه هلأ ..كل نظرة ...بكلمة! الساعة هلا ثمانية الصبح، والناس باب القاعة كوام كوام، كتل بشرية فوق بعضها البعض..جبال من الشنت ملونة أشكال ألوان..صياح الأطفال...شباب وصبايا بتستنى فتح "ديوتي فري" ...اللي بدو دخان واللي بدها عطر واكسسوارات..عتالين بضحكوا لأي بخشيش كان...واحنا بننجر للضحكة الحلوة والحمد لله... وبعد ما شفت هالشوفة... قررت أغامر وأروح "في آي بي" ...
تجربة الجسر بتضلها سيئة، ومهما دفع الفلسطيني مصاري عمرها ما بتصير حلوة!، أخدت رقم دوري وطلع حظي الرقم 51...بس بتعرفوا؟! لو كان "السستم" شغال صح كان مشيت أنا من بدري..لهلا الرقم 22..مع العلم اني دافع زي أي واحد ودافع بالعملة الصعبة" بالأخضر" بس واضح انو الأخضر لحاله هالأيام ما بنفع، يعني بدك اتفت عشان الناس تحترمك وبعد ما تحترمك بتمشيك حتى ولو على حساب "السستم". يعني المعادلة هلا معك أخضر+ فت = بتمشي أمورك، أخضر من غير فت ..بدك تقعد عاقل ولا ينسمعلك نفس حتى لو كنت "في آي بي". فبتصير المعادلة الإجمالية الي معاه واللي ما معو واحد ..هادا اذا بدكش اتفت!!
أنا متأكد انه الشركات الخاصة بتعطي صورة غلط في أغلب الأحيان عن ترتيب النظام وتقديم الخدمات بشكل لائق وملائم للمسافرين، فأهم شي للشركات هوي المصاري..الربح..ولا فارقه معهم النظام ولا ترتيب الأمور ولا انه أمرق ولا عمريني ما مرقت.. ولا فارق انو الترتيب مهم ولا لأ..بس واضحة الأمور... انها كل ما كان هناك أزمة كل ما كان ربح أكثر غير شرعي لبعض العاملين من الموظفين الصغار في الشركة، أنا هيك شايف قدام عيني، وحكيت للزلمة المحاسب" بتمنى عليك اتمشي الأمور حسب الرقم" فرد علي" انت شو شايف غيرهيك". بس اللي بصير غير هيك...وافهموها مثل مابدكم تفهموها يا جماعة الخير...هذا الشي انا شايفه بعيني ومش سامع عنه من حدا تاني حدى ...أصلا الكل شايف وما حكى... طيب لييييش؟ بمسكك موظف ما بتعطيه معاملتك الا هو مخلص الموضوع بلمح البصر، وما بتنسهوش من الحلاوة على رأي ولاد عمنا المصريين طب ما إنتوا دافعين سمعوونا صووووووتكم. مش بقولوا ربنا ما بسمع من ساكت...ليه قاعدين وشايفين شو بصير وراضيين؟!! غريبين يا فلسطينيين؟!
واللي بزيد الطين بله، انو احنا شعب قيادات...شعب كله "في آي بي"..وشعب مستعجل ما بتعرف ليه مستعجل؟ يعني ممكن القدس راح اتضيع مثلاً..أو يعني الأخ اذا ما مرق قبلي أنا اللي انا رقمي قبله..تجارته راح اتضيع...لا والأدهى من هيك بجيك واحد مولع سيجارة ومش عاجبه شي وبتطلع علينا احنا اللي دافعين زينا زيه وشو بحكي بصوت عالي" انا دبلوماسي...عارفين شو دبلوماسي؟؟!" أقسم بالله إنا عارفين...باسم الموجودين كلنا هون بنبوس ايدك وحللنا الأزمة وما ترمي حكي..برد عليه واحد من لهجته واضح انه خليلي" يعني انت دبلوماسي...طيب أنا معاي تنسيق..مين الأهم؟!"
ولا واحد عاجبه شو اللي بصير، وكله بتأفأف ..." يعني احنا دافعين وبنتبهدل"" والله لو رحنا عادي أحسن بدل ما دفعنا 40 دولار يا زلمة شو اللي بصير فينا احنا الفلسطينيين..السفر بهدلة...خلص ما بدي أسافر""بدي أطلع أدخن..أحرق حالي أحسن لي...والله ضاعت فرحة السفر كلها".
وصل رقمي، رحت دفعت..وحكالي المحاسب" في أزمة اليوم مش طبيعية..بس يا أستاذ الحكي ماعليه جمرك...احنا بنمشي اللي معهم تنسيق..والدبلوماسيين..والتجار الكبار..والمقدسيين الهم معامله خاصة..انت شو بتفكر..وكمان الأجانب..اتفضل استريح..لحين ما ننده عليك..الله معك.." شو رايكم باللي حكاه؟!
المهم استنيت كمان ساعة ونص، ليش بالكم؟ قال بقلك الإسرائيليين حاجزين السيارات...مع انه قدام عيني بتيجي السيارات وبتحمل مسافرين، طيب يا إخوان وين الدور؟ طب ليش بركبوا هدول العالم وانا وغيري ما بنركب...حدى يفهمني؟ طب ما إحنا دافعين...شكله الواحد لازم يكون في آي بي + سي ان ان + اف بي آي تاتزبط الحكايه... الله يكون في عون المواطن اللي مش في آي بي.