اشمعنا بس في رام الله؟!

راية نيوز: شو السبب انه فنجان القهوة أو الإسبرسو في محل أغلى من محل ثاني؟ شو السبب اللي بخلي سعر سندويش الفلافل يترواح من 2 إلى 5 شيكل؟ ممكن الشطة نوعها غير؟ وبرضه شو اللي بخلي سعر الأرجيلة مرة 5 ومرة 30 شيكل يا حرااااااااااااااااااااام ...مع انه نوع المعسل واحد.
طبعاً أنا بحكي عن أسعار رام الله يا سيدي، مش أسعار جنين أو رفح... في رام الله الأسعار مثل البورصة الله وكيلكم الكل بشتري على طلوووووووع. آه طلوع؟ كيف؟ أنا بحكيلكم كيف؟ أول ما يفتح محل بتكون أسعاره نار، بفتح محل تاني جديد بروحوا الناس على المحل التاني وأسعاره مش نار أسعاره بركان.
ما بعرف بالتجارة منيح، بس في قاعدة بتحكي انه كل ما بكثر العرض السعر بقل، وكل ما بزيد الطلب السعر بعلا بالعلالي. طيب في رام الله كثير محلات كافي شوبات ومطاعم ومقاهي وفنادق....الخ والحبل على الجرار... كل يوم بفتح واحد والحمد لله، طب ليه الأسعار ما بتنخفض بسبب المنافسة؟!
بدي أحكيلكم قصة صغيرة صارت معي، وبطلها أبو رامي اللي هوي أبوي، حكيتلكم انه أبوي فلاح ابن فلاح... وصل على رام الله بعد مشوار في الباص من شويكة قضاء طولكرم أخذ وقت بالزبط ساعتين. طبعاً أبو رامي شريب قهوة فأول ما وصل بدو قهوة وبدو يدخن "دخان عربي لف" رحت أنا وإياه على محل طلبتله قهوة كبيرة وأنا أخذت كاسة عصير برتقال. دفعت 30 شيكل وطلعنا..
فأبو رامي بحكيلي: شو كاين ما تدفع؟ متخليش عليك اديون يابا..
أنا: له يابا سلامة خيرك شو ديون؟ ولو
أبو رامي: ولشو دفعت 30 شيكل دخلك؟
أنا: 30 شيكل سعر القهوة وكاسة العصير.. وبدهم مني 3 شيكل..بس انا محسوب على المحل فما دفعتلهم.
أبو رامي: شو بتخرف؟ 30 شيكل على شوووووووووو؟ وقية القهوة 8 شيكل بتشرب كل اللي في المحل.. وبكسة البرتقان "البرتقال" بين 8 أو 10 شيكل بتشرب اللي في الشارع. الله أكبر..هاي رام الله باريس. ولو أنا ببيع البكسة بـ 10 شيكل.. و5 حبات برتقال بعملن كاسة بـ 10 شيكل.
طبعاً من يومها وأبوي بحكي انه عايش في الضفة واحنا عايشين في باريس... وكل ما أنزل بحملني بكسة برتقان وأكم من حبة لمون... أنا بحكي أشياء شخصية.. بس كل واحد أكيد بشاركني في قصة مختلفة.. بس المضمون واحد...الأسعار منوعة في رام الله أو على مستوى الوطن.
واتنقل يا مواطن من محل لمحل في رام الله وأطلب حضرتك المنيوو.. عشان تشوف فنجان الإسبرسو بتراوح سعره من 7 الى 14 شيكل طبعاً من غير الضريبة والخدمة... وممكن يلبسك قنينة مياه معدنية صغيرة بـ5 شيكل..هيك خاااااوااا.. وبكون الفنجان فيه شفتين بالعدد... .
يا الله وأنا شو ذنب أهلي في الموضوع.. إذا واحد بدو يعزم عيلته على مطعم "ماي هاوس" أو يشرب مع صحابه شي درنك في كافيه "تايم" شو بدو يدفع الواحد ...بختل توازن الراااااااااااااااااااااااااتب....بس الناس بتروح وبتنبسط... وبتحكيلك هيك رام الله... وبنص الشهر الواحد بصير يمد ايده للدين... على راي الختيار زياد رحباني "شي عجيب! كيف ما شي؟ .. مخشخش من دون خشخاشة ... ولا أهبل لشو ماشي.. تاهو بأمرك كيف ماشي؟..شي عجيب! ..بس ما شي" .
وهون يا جماعة... بنسأل وين الناس اللي ماسكين الأسعار؟؟ لأنه فلتت.. ومش فلتت وبس.. صارت الشغلة شوربة على الآخر... اي حتى صحن الشوربة صار بـ 40 شيكل...امسكووووووها قبل ما تفلت.. امسكوووها...

كان معكم رامي مهداوي...
من مقهى في رام الله
واللي دفع حق عصير البرتقان اللي شربته الروائي د. احمد حرب.. يسلمواااااا
وسامحني يابا...