زياد الرحباني يٌكفر تجويع الغزيين

الكاتب: د. محمد عودة

عزيزتي السيدة فيروز المحترمة
الحقيقة قلبي بيوجعني على صديقي صديقي الراحل زياد فلذة كبدك له جنات السماءوالارض طولا وعرض، لك حسن العزاء وطول البقاء، عم اكتبلك لانه قلبي محروق رغم انه زياد حاضر في الغياب ربما أكثر منه في الحضور.
بدون مقدمات أنا عاتب عليكي. وزعلان منك، من أنا وزغير وانت بتخبريني عن عالم حلو وناس طيبين وكل شيء منيح … يمكن إنتي قرفانة مثلي هالإيام من الوضع ومش عم بتابعي الأخبار خلليني إعطيكي فكرة عن هيدا العالم شو صار فيو.
قبل كل شي، لا تسأليني كيفك انت ? لأني مني منيح و رح قلك ليش،اول شي زيادنا رحل وثاني شي البوسطة يللي كانت ناقلة وتكوف من ضيعة بيت حانون على ضيعة الشجاعية طول الطريق وهو بيوكل خس وسكران بس ما عم بتفرج على بنت الجيران ،كنا مفكرينة بدو يشرب قهوة على مفرق حي الدرج عشان يعلن عن وقف شلال الدم واطلاق صراح كل الاسرى ومن ضمنهم تاعون غلاف غزة.بصراحة طلع سكران اكثر من حنا وما جاب سيرة الجوعانين ولا الشهدا ولا الجرحى،بس كان همه يوخد هل كام مجعوم ويروح يشرب نخبهم مع ميليكوفسكي.من ما رجع على البلاد الي اغتصبها من الهنود الحمر وليالي الشمال حزينة والظاهر حُزنا حيطَول.
القهوة يللي عمفرق مخيم نور شمس، اليهود هدموا المخيم بس القهوة بعدها موجودة، مع انه زبوناتها عم يشربوا معسل بدل التنباك لكن كانت وقفتهم وقفة اسود دفاعا عن المخيم كاساس ورمزللقضية.
قلتيلي احكيلي احكيلي عن بلدك؟ شو بدي إحكيلك عن بلدي؟ هيدي ما غيرا فلسطين الخضرة الله وكيلك مع هل المذبحة والابادة الي قبضت ارواح ميت ألف وجرحت ميتين ألف ودمرت غزة ومخيم جنين ونور شمس وطولكرم، ومع والاستيلاء على الاراضي وسن قانون بسط السيادة، صارت العيشة فيها صعبة ومع هيك بنودع زمان وبنروح لزمان، بنقول رايحين وبنكون راجعين على فلسطين كل فلسطين.
بحكيلك عن جسر العودة؟ العوض بسلامتك … إسرائيل هدمتو بمساعدة ترامب والاميركان.
أحكيلك عن أسامينا؟ والله يا ست عم نندبح في سوريا وليبيا واليمن والعراق وفلسطين بسبب أسامينا … بتتذكري يا ست فيروز الدكانة يللي كانت بحي الشيخ عجلين؟ إيه هيدي سكرت لأن لانه ما عاد فيها شي ينباع وصاحبها انقصف وهو مروح بعد ما سكرها، والبنيات والصبيان يللي كانوا يلعبوا عالمي صارت همومهم كبيرة وما عاد فيهم يلعبوا صارت قصتهم جدية ومش لعبة في مواجهة الجيش المدجج بالموت وصار مطلوب منهم يستنوا كيس طحين ترميه طيارة مع صاروخ او قنبلة من طيارة تانية، هم منهم كافرين بس التجويع كفر والجوع كافر.
أما حنا السكران لسا سكران بس ما عاد ضروري يصور بنت الجيران لأنها من بعد ما عملت بوتوكس لشفافها صارت عم تحط صورها على الفيسبوك والانستغرام والسناب وتويتر وصار يشوفن وقت بدو.
خيو عزمي من زمان سافر على قطر وبعدو ما رجع لكن الحمد لله قايم بدوره تمام في اقناع اهل غزة بالهجرة، اما خيو نبيل صار يصلي مع المسلمين بالصف الاول وهو حاطط الصليب وصار رمز لوحدة الشعب الفلسطيني بغض النظر عن الدين والمعتقد.
على فكرة بعدو في ناس عند مراكز توزيع المساعدات تنطر الجوعانين عشان ينتفوهم بأمر من النتن ولجنة المساعدات وإذا لزم الامر يطخوهم بالرشاشات، من كثر الجوع حتى الجوعانين بنتفوا بعض إذا حد فكر يسبق على رغيف خبز او كيس طحين.
أما الهوى يللي عم ينسم علينا صارت ريحتو بشعة لأنها جاية من جهة الجيش يلي على دوار نتساريم، ودوار الكويت ومليانه فلفل وغاز ودخان مسيل دموع، قنابل وزنها الفين كيلو وصواريخ ذكية واخرى غبية.
في أخبار مش حلوة يا فيروز … مختار المخاتير عطاكي عمره من زمان … بس خيو أخذ المخترة من بعده ومن وقتها بعدو مختار لأنو الظروف الأمنية القاهرة والاحتلال ما عم تسمح إجراء إنتخابات كمان خوف من خيو الي ناوي يترشح.
بيّك يللي راح مع العسكر خطفوه جنود كتيبة جولاني واليوم هو موجود بسجن عوف ونقص وزنو للنص لانهم عاملينلو ريجيم اجباري، أما عبدو فمسكين رمى حالو عن سطح البلدية لأن وردة الجورية تركتو و هربت مع مسؤول كبير كبر السما الى تركيا بعد ما شكلّها ألماس، بس الخبرية الحلوة إنو شادي ما عاد ضايع … إيه لقيناه … ليكو بالمخيم عم بحضر حالو ليصير شي مهم ويمكن يصير محل المسؤول الي اخذ جورية على تركية.
وبدي خبرك يا ست فيروز انه من زمان مهابيشنا ما دقت لأنه في كثير بيوت عزاء والمهابيش تعبير عن الفرح والظروف ما بتسمح حتى لو بدنا نفرح ما في مصاري نشتري قهوة للمهابيش لأنه سموتريتش سرق مصرياتنا..
لبنان كمان مثلو مثل فلسطين صار فيو احتلال ظاهره سكر خفيف وضحاياه اقل على الرغم من انه نوعيتهم بتوجع، اما عندنا يا حسرتي تجمعت كل الاحتلالات ومع هيك لازم تضلي تغني بحبك يا لبنان.
.
كلمة أخيرة يا ست فيروز، الله يرضى عليكي لا بقي تغني ردني إلى بلادي لانه اذا ما رديتي حالك ما حدا راح يردك لانهن كلهن مشغولين بالتتبيع والتطبيع مع المحتلين تحت عنوان اتفاقيات إبراهيم والله يستر من انه يجيبوا اتفاقيات كوشنير وترامب ويمكن ايلون ماسك.