أبوك وأبوي وأبو عماد

الكاتب: رامي مهداوي

رايه نيوز: التقيت صدفة برجال شرواكم بالخير، الشيب معبي راسه، وبتحس الزمن وتجاربه الحلوة والمرة محفورة في تجاعيد وجهه، عرفني عن حالو" أبو عماد"، بدينا نحكي مع بعض وفتحلي قلبه وكأني صديق قديم... وسيرة بتجر سيرة، لحد ما وصلنا لقصة ابنه عماد..لازم أجوزه هالسنة، خلص عماد كبر وصار 34 سنة.
شفناله أشكال وألوان، بس ياعمي مش عارف ماله، مع العلم... انا قلتله هاي السنة خلص مش راح تمزط منها، ولو بالقوة يعني هوي شو مفكر حاله... انا بدي أفرح فيه، بدي أشوف كتاكيت حوالي بدي أنبسط بخلفته، بس يا عمي مش عارف هالجيل مش مثل جيلنا، لما الواحد كان ما يصدق وأبوه يجوزه.. أقسم بالله اني تجوزت ام عماد من غير ما أعرفها... وسيد عماد يعني أبوي هوي اللي اختارها واختار اسم عماد.
ــ والله يا عمي مثلك فيه آباء كثار... طب ما سألت عماد ليه ما بدو يتجوز؟
عماد شب متعلم، أخذ منحة من الختيار الله يرحم روحه، اتعلم في بريطانيا أربع سنوات... والدنيا كلها مفتوحة قدامه، وبابتسامة حكالي، عماد شكله بدور على "مقومات" واضحة.. بس أنا قلتله السنة يعني السنة لازم تتجوز. ولعلمك انا وعماد صحبة، مش أب وابنه.. علاقتنا قوية، وبيني وبينك بحبه أكثر من إمه، بجبلي سجاير أجنبية لما يسافر ..وبحكيلي عن بلاد بره... بس يا عمي انا خايف انه يهاجر، لأنه بحب السفر وبحب الدنيا. فكرك بهاجر ووببطل يسأل عني؟ لازم أجوزه.
ــ ممكن يكون مصاحب؟
ههههههه شو مصاحب، انت ما بتعرف عماد... عماد مصاحب كثير، رافع راسي الله يوفقه، بتصدق من فتره لفترة بجيب معاه بنت ودايماً بعزمهن على أكلة ورق دوالي.. الله وكيلك بحبين هاي الطبخة وكل وحدة أحلى من الثانية، بس يا ابني انا بقلك بدي أجوزه، هذول البنات ما بدهن يتجوزن على راي عماد، عماد حكالي هذول بنات بحبوا الحفلات وشمات الهوا..رقص..طلعات ونزلات. يعني شغل انبساط.. وكمان وعدني عماد انه يطلعني طلعة مع أصحابه وصاحباته.. اسمع لازم تتعرف على عماد.
ــ ولو بنات الناس مش هيك يا أبو عماد؟
قرب جاي، الحلو في مجتمعنا انه هيك وهيك .. يعني حلوة حياة الانبساط بس برضه الست في مجتمعنا عليها مسؤوليات كثيرة، وأنا بدي اياه يتجوز بنت قد حالها... تتحمل المسؤولية وتشيل معاه وتخفف عنه وقت الحزة واللزة. أي بعدين والله ابني ما فيه منه شو بدهن أحسن من هيك.. حلاوة .. وخفة دم... الله يحسن الحال لأحسن حال ويفرح الجميع.
ــ فتشتله من هالقرايب، أكيد في صبايا من العيلة؟
ولو، انت سيد العاقلين، شوف القرايب عقارب وخصوصاً وقت الجيزة، العب وحدك تيجي راضي... بلا بنت خالي بلا بنت عمي ولا عمتي... انت سيد العاقلين، الدم ثقيل على بعض... وبعدين أنا بدي ولاده يطلعه مريضين؟!، مش رسول الله (عليه الصلاة والسلام) قال: غربوا النكاح. فكرك يعني عماد ممكن يكون متجوز أجنبية ويهاجر، ويتركني لحالنا أنا وإمه.. والله بسافر لعنده وبهاجر، بس وين بدي أترك امه أنا التاني؟!
وبعدين انت ليه مبلش فيي خرط أسئلة، ليكون انت بتشتغل مخابرات... اسمع يا ابني، أنا وعماد صحاب من زمان وما بدي حدى يدخل بينا، الله يرضى عليك وتنول اللي بتريده.. انا عماد مجوزه السنة امجوزه وما بدي حدى يلعب في راسه، وأنا راح أساعده بالمال عشان يجبلنا ولي العهد، ولعلمك كمان أنا بترك البيت وبخليه يعيش فيه وانا وامه بنسكن في الحواصل اللي تحت. بس يوافق طنيب عليكم لا اتخلوه يهاجر. وكمان ام عماد بدها اتبيع ذهبها عشان انعفش البيت.
ــ له يا حج انا مش مخابرات، وكمان مش راح ادخل بينك وبين عماد، وكمان انت اللي طلبت تشرب قهوة، انسيت ولا شو؟ وبعدين يا حج، نيال ابنك فيك، بس فكرك عماد مهتم فيك زي ما انت مهتم فيه؟ طب عماد ليه ما يشتغل ويأسس حاله؟
عماد شب متعلم، ولعلمك درس فن وإخراج، وهوي بعرف في الحياة أكثر من أي شب في جيله، بس الفن مش جاي معاه وهوي بظل نايم بالنهار عشان يهرب من واقع النهار مثل ما بحكيلي وبسهر بالليل بالفن مع الشباب والصبايا وبرجع وجه الصبح... ابني فنان.. وانا بدعمه بالمصاريف لازم أدعمه في البداية ولا السهر بالليل بتعب، مش زي حضرتك موظف بالنهار، عماد برجع وجه الصبح مستوي... انا لازم أجوزه هاي الصيفية.