أنا بديش أتجوز حرف !!
الكاتب: علي عبيدات
من أجمل سمّات البدن الصباحية، إنك تفوت ع المكتب وتلاقي كرت عرس، بترسم ابتسامة عريضة، وبتصير تفكر فيها مية دولار نقوط، أو بتصير تفكر زي أحد الأصدقاء إنو يالله ليش كلهم تجوزوا إلا أنا مش فاضي، وبطلعلك نشيد ستي الوطني "كل الجمال بتبارك إلا جملك بارك".
والله بتفتح الكرت، بطلعلك ورد، ورسومات جميلة، ويستمر الانشكاح في رحلة البحث عن العريس، بس تفتح الكرت، إلا اسم العريس ناطط بوجهك قد البلد، واسم العروس بكون محطوط حرف الشين ولا السين، ولا مرسوم محله فراشة.
يا عمي هو إنت متجوز صبية ومستحي من إسمها، ولا إنت مخلف بنت ومخبيها وبدك تنقلها من زنزانة لزنزانة، طيب مهو كل البلد بتعرف اسمها، وحارات من البلدات المجاورة، لشو حرف الشين، لأ وبالانجليزي كمان.
بلاش يا أخي، بدك تخبيها، طيب يا رجل مهي كل وكالات الاستخبارات العالمية، بتقدرش توصل للي بعملنه نسوان الحارة، من أول ما بتفكر تعجب فيها، بجيبن تاريخ أبوها وتاريخ إمها، ولون اسنانها ولون عينيها، وتعمم نتائج البحث على كل نسوان الحارة والبلد، والمتزوجات منهن في البلدات المجاورة.
حتى وأنا صغير، لمى كان ييجي كرت العرس، تفتح تلاقي إسم العريس، وحوليه فراش طاير، وبسس بتموي، كنت أفكر "كريمته" اسم العروس، حتى إني كنت متفاجئ واتساءل، يالله ليش كل بنات البلد اسمهن كريمة.
وفي ناس من كثر التكبير في شأن العريس، بتلاقيه حاطط العريس الدكتور فلان، ولا المهندس علان، طيب إفرض العريس مش مخلص توجيهي، طيب بالمناسبة الصبية المسخمطة العروس، شو وضعها من الإعراب، ولا حاطين الحرف بالإنجليزي عشان يكون ممنوع من الصرف ؟؟!!
تخيل معي لو كمان العريس بحطوا اسمه حرف، وبتصير انت تتساءل، اليوم عرس مين، والله عرس شين وصاد، بتيجي إمك تقلك يلا قوم من النوم اليوم عرس ميم وحاء، طيب في هاي الحالة مين بده يكون المأذون، أكيد أبو الحروف.
وإلي بده يقلي شرع ودين، بقله يا رجل مش شرط من شروط الزواج في الديانات السماوية الإشهار، مش تعطيني كرت العرس، وأكون خايف اسأل عرس مين، خوف تفهم إني بسأل عن إسم العروس، ومن وين تعرف عليها العريس.
يا عمي أنا بديش اتجوز حرف، أنا لمن بدي أتجوز بدي كل الشعب العربي، والشعوب الصديقة، والمناضلين في أمريكا اللاتينية وفيتنام، يعرفوا إنو هاي الصبية هي نصي الثاني، وإني بدي أكمل حياتي معها ورافع راسي فيها.
وبما إني بظل أحكي الثائرون للثائرات، فأنا مفكر أعمل خطبتي بنص الدوار، ودعوة العرس رح تكون بيان ببلش يا جماهير شعبنا، وأكيد رح أحط اسم العروس، ولولا إني بخاف أبالغ، إلا أطبع صورتي وصورتها بوستر وألزقه في الشوارع.
وعشان يكون الإشهار ثوري، ليلة السهرة لازم تكون إضراب شامل، ويوم العرس منع تجول، والزفة مسيرة، وأهم إشي أهم إشي، إنو الدبيكة يكونوا ملثمين، وزينة العرس بنعملها بـ "بوية رش"، والألعاب النارية بعدين بقلكم شو !!
المحصلة يا جماعة، إنو ما في مبرر لإنو نحط إسم العروس حرف، لا ديني ولا اجتماعي، أكيد مش رح يوكلوها الناس، والأكيد إني مش متجوز حرف !!
