جرة مصاري
الكاتب: رامي مهداوي
رايه نيوز: ما في أزكى من الأكل البايت، مش مصدقين جربوا وادعولي بالخير، آه بالخير، ولو مستكثرين تدعوا بالخير. انا بهاي العملية وفرت عليكم شيكلين.. ثلاثة... خمسة كيف؟ شو كيف أنا وفرت عليكم استخدام جرة المصاري، عفواً عفواً قصدي جرة الغاز، يا عمي بحكيلكم جرة الغاز مش قنبلة الغاز اللي بنحكيلها مسيل للدموع. جرة الغاز بتاعة الطبيخ والتدفئة. صار اسمها من يوم وطالع جرة مصاري.
ولو؛ احنا شعب معتمد على هالجرة مش على الهجرة، بنشرب قهوة وشاي... بنطبخ مقلوبة ومجدرة... وشوربة عدس في الشتا... وبنتدفى عليها، قصدي بنتدفى على الجرة مش على شوربة العدس!... بس القصة انها صايرة تغلى غلي... ناااااااار طالعة ومش مهدية.
يعني أكيد احنا مش بلد منتج للغاز مثل قطر أو مصر، بس لازم نلاقي حل، انتو متخيلين جرة الغاز العام الماضي زي هيك وقت كانت ما بين 50 الى 55 شيكل... أكيد انتو هلا ما بتعرفوا كم سعرها لأنكم من الطبقة اللي ما بتشرب قهوة بتشرب اسبرسو وما بتوكلوا مقلوبة بتوكلوا بيتزا، سعرها يا أعزائي يتراوح ما بين 75 الى 85 شيكل. مع العلم انه سعرها مثل ما بحكوا 66 شيكل من الشركة المنتجة.
الاسبوع الماضي كنت في اجتماع مع أكمن مسؤول في البلد ــ وصانعي قرار ــ على مستوى محافظة رام الله والبيرة، أقسم بالله أقسم بالله أقسم بالله إني طرحت الموضوع وقلتلهم لازم انحط حد للمهزلة اللي بتصير في البلد بخصوص جرة الغاز، فواحد حكالي يعني انت مابدك توصلك الجرة للبيت ادفع بزيادة... أهلين عمي أدفع ازيادة 20 شيكل ولو. واحد ثاني حكالي احنا بدنا أسماء هاي الوكالات اللي بتبيع هيك. أهلين طب كل محلات بيع الغاز هيك يعني هيي بتبيع مخدرات، حركوا حالكم وتابعوهم.
انتو متخيلين شو سعرها برتفع، والمشكلة ما في سعر موحد ــ كل يغني على جراره ــ، والمشكلة الأعوص ما في حدا حاسس فينا، انشفنا من السكعة سكعة بتخر في العظم، والله بررررد... بس أنا بعجبكم مشغل عين وحدة من الدفاية وكلنا ملزقين فيها. القصة مش قصة بخل ولا توفير لا سمح الله، القصة حفاظ على البيئة مش أكثر.... أحيييي بردااااان.
وأنتم يا مواطنين يا غلابة، ليه معصبين ومش عاجبكم العجب وبتسبوا على البلد وبتسبوا على التجار وبتسبوا على الطقس ولو ما بدكم دولة؟ ما بدكم استقرار سياسي وتنمية واقتصاد مستدام؟ ما بدكم سعادة؟؟ كل هذا بدوا رفع أسعار... يا جماعة موتوا من البرد والسكعة سبيلاً للوطن والملك هاي ضريبة بناء الوطن.
وبعدين يا أهل الخير في فوائد كثير لرفع أسعار جرة الغاز: أول شي بتوفر ماء، لأنكم بتصيروا بالمناسبات تا تطبخوا مش بس عشان اللحمة غالية فهي سبب تاني... وهيك ببطل فيه جلي صحون وطناجر ومعالق. وتاني شي انت بتشجع التجارة؛ لأنه كل ما ارتفعت جرة الغاز، بتصير حضرتك تلبس ملابس ثقيلة وهيك تجارة الملابس بتتنشط، وكمان بتصير تستهلك مأكولات ومشروبات تعطيك تدفئة وطاقة مثل" الكستنا، البطاطا الحلوة، عصير العنب، حلاوة اطحينية، سحلب، دبس، بليلة وكثير أشياء" هاي الأشياء وغيرها بتنعش جزء من الاقتصاد الفلسطيني والاقتصاد أهم شي لبناء الدولة.
يعني النتيجة، ارتفاع سعر الغاز أولا وأخيرا هو لمصلحتك يا مواطن، لأنه بيجبرك تعمّر هالبلد... إذا مش بكيفك، لا غصب عنك. وعمار يا بلد... وعبي الجرة ولولح فيها.
ولو؛ احنا شعب معتمد على هالجرة مش على الهجرة، بنشرب قهوة وشاي... بنطبخ مقلوبة ومجدرة... وشوربة عدس في الشتا... وبنتدفى عليها، قصدي بنتدفى على الجرة مش على شوربة العدس!... بس القصة انها صايرة تغلى غلي... ناااااااار طالعة ومش مهدية.
يعني أكيد احنا مش بلد منتج للغاز مثل قطر أو مصر، بس لازم نلاقي حل، انتو متخيلين جرة الغاز العام الماضي زي هيك وقت كانت ما بين 50 الى 55 شيكل... أكيد انتو هلا ما بتعرفوا كم سعرها لأنكم من الطبقة اللي ما بتشرب قهوة بتشرب اسبرسو وما بتوكلوا مقلوبة بتوكلوا بيتزا، سعرها يا أعزائي يتراوح ما بين 75 الى 85 شيكل. مع العلم انه سعرها مثل ما بحكوا 66 شيكل من الشركة المنتجة.
الاسبوع الماضي كنت في اجتماع مع أكمن مسؤول في البلد ــ وصانعي قرار ــ على مستوى محافظة رام الله والبيرة، أقسم بالله أقسم بالله أقسم بالله إني طرحت الموضوع وقلتلهم لازم انحط حد للمهزلة اللي بتصير في البلد بخصوص جرة الغاز، فواحد حكالي يعني انت مابدك توصلك الجرة للبيت ادفع بزيادة... أهلين عمي أدفع ازيادة 20 شيكل ولو. واحد ثاني حكالي احنا بدنا أسماء هاي الوكالات اللي بتبيع هيك. أهلين طب كل محلات بيع الغاز هيك يعني هيي بتبيع مخدرات، حركوا حالكم وتابعوهم.
انتو متخيلين شو سعرها برتفع، والمشكلة ما في سعر موحد ــ كل يغني على جراره ــ، والمشكلة الأعوص ما في حدا حاسس فينا، انشفنا من السكعة سكعة بتخر في العظم، والله بررررد... بس أنا بعجبكم مشغل عين وحدة من الدفاية وكلنا ملزقين فيها. القصة مش قصة بخل ولا توفير لا سمح الله، القصة حفاظ على البيئة مش أكثر.... أحيييي بردااااان.
وأنتم يا مواطنين يا غلابة، ليه معصبين ومش عاجبكم العجب وبتسبوا على البلد وبتسبوا على التجار وبتسبوا على الطقس ولو ما بدكم دولة؟ ما بدكم استقرار سياسي وتنمية واقتصاد مستدام؟ ما بدكم سعادة؟؟ كل هذا بدوا رفع أسعار... يا جماعة موتوا من البرد والسكعة سبيلاً للوطن والملك هاي ضريبة بناء الوطن.
وبعدين يا أهل الخير في فوائد كثير لرفع أسعار جرة الغاز: أول شي بتوفر ماء، لأنكم بتصيروا بالمناسبات تا تطبخوا مش بس عشان اللحمة غالية فهي سبب تاني... وهيك ببطل فيه جلي صحون وطناجر ومعالق. وتاني شي انت بتشجع التجارة؛ لأنه كل ما ارتفعت جرة الغاز، بتصير حضرتك تلبس ملابس ثقيلة وهيك تجارة الملابس بتتنشط، وكمان بتصير تستهلك مأكولات ومشروبات تعطيك تدفئة وطاقة مثل" الكستنا، البطاطا الحلوة، عصير العنب، حلاوة اطحينية، سحلب، دبس، بليلة وكثير أشياء" هاي الأشياء وغيرها بتنعش جزء من الاقتصاد الفلسطيني والاقتصاد أهم شي لبناء الدولة.
يعني النتيجة، ارتفاع سعر الغاز أولا وأخيرا هو لمصلحتك يا مواطن، لأنه بيجبرك تعمّر هالبلد... إذا مش بكيفك، لا غصب عنك. وعمار يا بلد... وعبي الجرة ولولح فيها.
هذا المقال يعبر عن وجهة نظر صاحبه، ولا يعبر بالضرورة عن وجهة نظر شبكة راية الإعلامية.
