بيان اعتذار رسمي… من خيمتي في مواصي خان يونس..

الكاتب: د. خالد صبحي الطويل

وصلني – زي غيري – إنو اسمي بتداولوه في القاهرة عشان أكون ضمن لجنة التكنوقراط اللي بدها تدير غزة بهالمرحلة.

والله شرف كبير، وما بنكره، بس للأسف الشديد… مش فاضي.

أنا من الصبح عندي مهام سيادية ما بتستناش:

أول إشي بطلع أصف دور على شاحنات الميّة الحلوة، وهاي لحالها بدها لجنة أزمة ومفاوضات وطوابير أطول من أي اجتماع عربي.

بعدها بدخل على ملف أخطر: "ملف الفِكّة".. فالمواصلات عنا ما بتعرف لا تحويل ولا بطاقة ولا “سامحنا”،، بدهم فِكّة، والفِكّة لازم تكون حديد مش ورق، وإن كانت ورق فلازم تكون مش مخزوقة، مش ممزوعة، مش مكسّرة نفسياً، وإلا السواق بنزلني من السيارة وكأني مخالف للقانون الدولي.

وبرجع على الخيمة أكمّل شغلي: أربط الشوادر عشان ما تطير،

أشد الخيمة عشان ما تقع،

وأولع النار عشان أم صبحي تحضّر الأكل… هذا إذا كان في أكل أصلاً.

وبنفس الوقت لازم أكون قاعد في المخيم، لأنو يمكن تيجي كوبونات المساعدات،

أو تيجي تكية الأكل من المطبخ العالمي، أو يطلع اسمنا على كيس طحين بعد انتظار طويل.

والأهم بدي انتظر جرة الغاز وإلا حتروح عليَُ.

وطبعاً ما بنقدر نتحرك كتير، لأنو لو طلعنا دقيقة، بتيجي المساعدة وتضيع، وبنرجع نوقف بالدور من أول وجديد..

فبصراحة،،

بين تعبئة الميّة،

والبحث عن فِكّة،

وربط الخيمة،

والوقوف بالطوابير،